پښتو | English
ebound Live Stream
تازه خبر:

یوې افغانې پيغلي په خپل لا س خامک شوی قرانکریم ملي موزیم ته سپاري
نیټه: Sat, 07 Oct 2017 13:27:29 +0000

 

هغه کندهارۍ پېغله چې ټول قران کریم یې پر خامک لیکلی، غواړي خپل دغه شهکار ملي موزیم ته وسپاري.
دغه ٢٨ کلنه پېغله زمرد افغان نومېږي او شاوخوا اووه نیم کاله یې پر دغه هنري او ظریف کار تېر کړي دي.
زمرد افغان له پژواک خبري اژانس سره په ځانګړې مرکه کې وویل، ښوونځی یې نه ده لوستی،  خو قران کریم یې له خپلې مور څخه زده کړی او لیک لوست هم کولای شي.
دې زیاته کړه، له ماشومتوبه یې له لیکلو، مطالعې او خامک سره مینه وه او دغه څه د دې لامل شول چې دا یوې هنري پنځونې ته اړ باسي.
هغه وايي، کلونه وړاندې یې د پلار له مړینې څو ورځې وروسته په ذهن کې ور وګرځېدل چې پر ټوکر د ستنې او تار په وسیله قران کریم ولیکي.
د دې په خبره، دا د دې لپاره هم خورا سخت کار او نوې تجربه وه؛ ځکه له دې وړاندې پر ټوکر چا د ستنې او تار په وسیله لیکل نه و کړي.
نوموړې زیاته کړه، لومړی به یې د قران الکریم توري په پنسیل قلم پر سپین کاټن ټوکر لیکل او بیا به یې د ستنې په وسیله په تور او زرین تار په ډېر هنر او ظرافت ګنډل.
خو دا وايي، د قران کریم هره پاڼه به يې پر ټوکر تر ليکلو وروسته د يوه دیني عالم تر نظر تېروله، څو اعراب او توري يې له اصل متن سره پرتله او تصحیح کړي او وروسته به يې کار پرې کاوه.
دغه راز دې یادونه وکړه چې د قران کریم د متن ژباړه یې په ژېړ ورېښمین تار ليکلې او ګنډلې ده.
خو نوموړې د دې پوښتنې په ځواب کې چې ولې یې د پښتو یا دري ژباړې پر ځای اردو ژباړه انتخاب کړې؟ وویل، دا چې دې په پاکستان کې د کډوالې په توګه ژوند کاوه؛ نو داسې قران کریم ته یې لاسرسی نه درلود چې په پښتو يا دري ژباړه وي.
زمرد زیاتوي، دغه هنري کار یې په ۷ کلونو او ۶ میاشتو کې بشپړ کړی او هره ورځ یې له سهار څخه د شپې تر ناوخته کار ورباندې کړی دی.
دا وايي، په دې لړ کې به خپلې مور او نورو مېرمنو له دې سخت کاره منع کوله خو ان کله کله به یې په پټه دا کار کاوه؛ ځکه خوښي او سکون یې ورکاوه.
خو دې وویل، دا کار هومره سخت و چې له بشپړېدو وروسته اوس دا خپله هم ورته حیرانه ده.
د مېرمن افغان په خبره، د قران کریم هره سپاره یې بېله جلد کړې چې د ټولو شمېر ۳۰ ته رسېږي.
دا له حکومت او فرهنګي ادارو کومه مشخصه غوښتنه نه لري، خو وايي حاضره ده د دې په لاس خامک شوی دغه قران کریم په ملي موزیم کې کېږدي او ډېر خلک یې ننداره وکړي.
د دې تر څنګ نوموړې یادونه وکړه، یوازېنۍ هیله یې په هېواد کې د سولې ټینګښت دی؛ څو خلک د دې جوګه شي په خپلو زامنو او لوڼو یو شان زده کړې وکړي او د دې په څېر له زده کړو بې برخې ونه اوسي.
د زمرد افغان د دې هنري پنځونې په اړه يې ورور مطیع الله وویل، خور یې د ویاړ کار کړی او د ټولې کورنۍ د خوښۍ لامل دی.
ده زیاته کړه، خور یې په خپل هنر د قران کریم د چمتو کولو لپاره ۲۷۰ متره سپین او زرغون ټوکر، ۶۳۰ ګوټه تار، ۶۰ تولې خالونه او نور توکي کارولي دي.
دی هم وايي، یوازې یې د خور نه، بلکې د ټولې کورنۍ یې پیغام دا دی چې خلک دې پر خپلو اولادونو (نجونو او هلکانو) زده کړې وکړي، څو د پوهې، فرهنګ او تهذیب پر لار روان شي.
د کندهار ښار یوه اوسېدونکې شافعه چې د خامک او لاسي هنرونو په برخه کې ډېره تجربه لري، د زمرد افغان کار د هنریت او ظرافت له پلوه بې جوړې ګڼي او وايي، دا تر ټولو سخت هنري کار دی.
دا چې په خپله هم له ماشومتوبه د ستنې او تار کار کوي، پژواک اژانس ته وویل، د کندهاریو مېرمنو د خامک د کارونو ځانګړتیا دا ده چې له خورا ډېر هنریت او ظرافت څخه په کې کار اخیستل کېږي او ډېره خواري غواړي.
خو پر ټوکر د خامک په وسیله د قران کریم لیکل تر هغه هم خورا سخته چاره ځکه ده چې هر توری او اعراب یې بېل بېل د ستنې او تار په وسیله لیکل او ګنډل لویه حوصله غواړي چې د هر چا د وس خبره نه ده.
شافعه له حکومت او فرهنګي ادارو غوښتنه کوي چې پېغله زمرد افغان د خپل دغه هنري او خورا سخت کار له امله ډېره وستایل شي او لاسنیوی یې وشي.

 

په فیسبوک کې شیر کول

بېرته شاته